انفلونزا وكونداليزا والسودان

نمشي وين والدنيا عتمة
يا حكومتنا العزيزة
كل احاديث المدينة
قصه اليخت اللذيذة
والتعرفو من مصيرنا
كلو تحت الطربيزة
وكل صباح الامة تصبح
بي مزاج ناس كونداليزا
ونحن صلعنا وكبرنا
وتاني ما بيدونا فيزا
***
والقصة ما قصة يخوت،
القصة قصة شعب جايع دار يموت
قصه البلد المكتح
وباني فوقو العنكبوت
قصة الايدز والملاريا
القالو ازمة بنكتوت
قصة الكلى لما تفشل
من شراب موية البيوت
قصة السيل البيطفح
فات خلاص حد السكوت
قصة الوطن المجرح
وكل يوم خاشيهو بوت
وايه الفرق بين فرح الوطن
وفرح الحبيبة وبسمتا
وايه الفرق بين الرفد
وبين الضياع والشلهتة
وايه الفرق بين الرسم
في الامتحان والشخبتة
وايه الفرق بين الرسوم
وبين القلع والهمبتة
وايه الفرق بين المقابر
والضماير الميتة
وايه الفرق بين موتة دايمة
وللا موتة مؤقتة
وايه الفرق بين العرس
والقرمصيص والكبرتة
وايه الفرق بين البري
وبين الكلام العكلتة
هل جينا في الزمن الخطأ
هل جينا في زمن الضجيج والسلبطة
هل جينا بالشعر الطوال
خشينا عهد الزعمطة
هل نحن عاجزين عن مواجهة المصايب والمحن
هل نحن اكوام من هلافيت الزمن
هل نحن كالابطال بندفع في الثمن
أم نحن اذيال الحكاوى الانتهن
هل نحن انسان القرون الممتهن
أم نحن اصحاب المباديء ويا أم ضفاير قودي الرسن
هل نحن جادين في الوطن
هل نحن اخوان في الوطن
هل نحن سيان في الوطن
هل نحن اخوان في المحن
هل نحن انسان الوطن
ام نحن من جان نمتحن
من نحن.. يا هذا الزمن
يا ام مصايب قودي الرسن
واهتفي... يا سيدي الحسن